القاهرة، مصر (CNN)— انتشرت صور لمصريين يرفعون علم المملكة العربية السعودية أثناء مظاهرات واحتفالات "عيد تحرير سيناء"، الاثنين، ما أثار جدلا واسع النطاق على وسائل التواصل الاجتماعي، وأعرب عدد من الإعلاميين والصحفيين عن انتقادهم لما وصفه الإعلامي سيد علي بـ"الهطل الوطني" واتهم الإعلامي، باسم يوسف، الرئيس عبدالفتاح السيسي بالاحتماء وراء الجيش العسكري وحماية ما وصفها بـ"مظاهرات كيادة مأجورة رافعين علم بلد تانية."
وحملت المصرية، منى البحيري، التي اشتهرت بمقولة "شات آب يور ماوس أوباما"، العلم السعودي، قائلة عن جزيرتي تيران وصنافير: "ما ياخودها الملك سلمان! الملك سلمان وقف معانا في عز الشدة، واللي بيتزايد وبيقول دي مصرية، طب هي مصرية بقى وإحنا إديناها للملك سلمان، ولو طلب الأهرامات حاديلوه الأهرمات وأبوالهول وأم الهول.. هو يأمر وإحنا بس نديله اللي هو عايزه."
وقال الإعلامي المصري، باسم يوسف: "النهاردة يوم مشهود في مصر. النظام اللي بيتشدق بالعسكرية و الوطنية و حماية الارض حرفيا خان كل المبادئ دي. قبض على شباب بينادي بمصرية الارض و حمى مظاهرات كيادة مأجورة رافعين علم بلد تانية. نظام مرعوب منزل قوات جيش لو بعتها سينا كان خلصت المعركة دي من زمان. نظام بيوجه أسلحته و امكانياته ضد شعبه لمصلحة بلد تانية. نظام واطي وإعلام اوطي."
وأضاف باسم يوسف: "طول عمري ماليش في نظرية المؤامرة. اصل لو فيه مؤامرة فعلا على مصر، حتعمل ايه اكتر من انها تخرب الاقتصاد و تفشخ الجنيه و تصرف مدخرات البلد في مشروعات وهمية، و تروج لانجازات كفتة و تصدر اوسخ مافيكي يا بلد في الاعلام و تقبض على الشباب في بيوتهم و تخلي منظرنا زبالة في العالم كله و تعذب اجانب و مصريين بدون تفرقة و تعتقل اللي بيطالب بوحدة الاراضي المصرية و تحمي مظاهرات رافعة اعلام دولة تانية."
وتابع يوسف: "وتحتفل بالتنازل مش بس عن الجزيرتين لكن بتخلي مصر عن مجرى ملاحي هو الاهم في المنطقة و تحويله لمجرى دولي و فقدان السيطرة عليه و استقبال وفد اسرائيلي صناعي لاول مرة و المطالبة علنا بتوسيع كامب ديفيد و توقيع اتفاقيات تسمح باثيوبيا انها تتغول على ميه النيل و اتفاقيات تضيع حقنا في الغاز مع قبرص و صرف اموال البلد في كمية سلاح احنا مش محتاجينه و رمي جنود الجيش في كمائن ثابتة تنضرب تلاتين مرة و انهيار مرعب في الصحة و التعليم و اطلاق كلاب سعرانة اسمهم امناء شرطة يقتلوا المواطنين. صحيح ، المؤامرة ممكن تعمل ايه اكتر من كده؟ انتم المؤامرة."
ومن جانبه، انتقد الإعلامي المصري، سيد علي، رفع علم السعودية في مظاهرات 25 أبريل، قائلا إنه "في ناس عبيطة تمارس نوع من أنواع الهطل الوطني، اللي نزلوا مع كل تقديري واحترامي وهما رافعين علم السعودية بأمارة إيه؟ مفيش دولة بتحتفل بيوم قومي عندها وبترفع أعلام دولة تانية.. هذا لا يُقلل من شأن السعودية، ولكنه يُحرج السعودية ويُحرج القيادة المصرية، إيه المنظر العبيط الأهطل ده؟ ما هذا الهطل الوطني؟ إيه شغل كيد النسا ده؟ ما هذا التدني الوطني؟ ما هذا الغباء الوطني؟" على حد تعبيره.