دبي، الإمارات العربية المتحدة (CNN)-- شهدت مواقع التواصل الاجتماعي، نشاطاً كبيراً بعد خطاب الرئيس المصري محمد مرسي، الأربعاء، خاصة من فئة الشباب التي انقسمت آرائهم بين مؤيد ومعارض، اختارنا لكم أبرز هذه التعليقات.

علق وليد حيدر قائلاً: "2 رؤساء سابقين، بعد ما كانوا دايماً راحلين، والله حاجه جديدة وجميلة جدا، بس عاوز أعرف هو دا كشف حساب لمين بالضبط؟"

فيما علقت مريم عاطف قائلة: "مرسي قال أحط ايدي هنا ألاقي ثعبان، أحط أيدي هنا الاقي عنكبوت، واحنا مال أهالينا إن أم أحمد لا تنظف القصر إلا في الأعياد، دي أم علاء كانت مخلياه فله."

وقال خالد طلعت: "لما مرسي يفهم اللي بيقوله نبقى نفهم حنا."

ومن جانبه قال أحمد ماجد: "لما مرسي عارف إن قناة دريم وقناة الحياه والنهار وcbc  حراميه وعالم فاسده، تعالي بقي ده انا نسيت وافتكرت، كنت ماشي تلف عليهم ليه وأنت بتضحك علي الناس عشان تنتخبك؟"

وقال سيف محمود: "مرسي يَعرف الواد إلي بيأخذ 20 جنيه عشان ينزل سكينة الكهرباء، لكن لا يعرف مين قتل 16 جندي على الحدود في رمضان الى فات، ومين اللي خطفوا الجنود في سينا!"

وعلى الصعيد الآخر قالت مريم يحي: "مَن الذى تحدث إلينا اليوم؟ مرسي الفلاح خاطب الفلاحين، مرسي البسيط خاطب المصريين البسطاء، مرسي المثقف خاطب مثقفين مصر، ومرسي القائد خاطب قيادات المؤسسات المصرية."

وقالت أم مصطفى نور الدين: "من رأى الخطاب جيد جداً، لكنه متأخر أحنا في القرف دا بقالنا فترة، البلطجية أتمكنوا والقتل بقى سهل وراح فيها ناس أبرياء، دا غير الرعب والخوف عند الناس، أتمنى أن الحال يتصلح بسرعة، وكل الكلاب دي تتمسك ويتحكم عليها وتترمى في السجون مكانها الطبيعي الأصلي."

وعلق أبو رمضان قائلاً: مش عاجبك الخطاب، اتفرجت عليه ليه؟ مش طايق تشوف الريس قعدت قدامه ساعتين ليه؟ مش مستوعب كلامه اصل كلامه للأذكياء فقط."

وقال ياسر أبو عمار: "خلاصه خطاب الزعيم أمس، أنا قاعد على قلوبكم يافلول، قاعد على قلوبكم يا المعارضه القذره، انا قاعد على قلوبكم يا قضاه النظام السابق، انا قاعد على قلوبكم يا إعلام النظام السابق، اطمئن يا شعب مصر رئيسك يفوت في الحديد، ولديه ثقة تفوق ثقة الأسد في نفسه."

أيضاً تجاوب هاني النحاس مع الخطاب قائلاً:" لابد الناس تفهم إن الراجل ده لا عايز سلطة ولا بطيخ، قاعد يحمي ويحافظ على الأمانة اللي عاوزين ينهبوها المجرمين، مش مكفيهم النهب اللي نهبوه كمان بيسخروا فلوسهم الحرام في اسقاط الدولة حسبي الله عليهم."

ويشار إلى أن موقع CNN بالعربية لا يمكنه التأكد بشكل مستقل من المعلومات الواردة على مواقع التواصل الاجتماعي.