باسم يوسف يهاجم أحمد موسى حول "تعويم الجنيه": المفروض يتعمل أفلام تسجيلية

دبي، الإمارات العربية المتحدة (CNN)— هاجم الإعلامي المصري الساخر، باسم يوسف، الجمعة، الإعلامي المصري، أحمد موسى بعد تصريحات الأخير عن تعويم الجنيه المصري وسعر الصرف.

وقال يوسف في تدوينة على صفحته بموقع التواصل الاجتماعي، فيسبوك: "المفروض يتعمل أفلام تسجيلية و دراسات و رسايل دكتوراه على احمد موسى و بقية شلة الاعلاميين الحلوة دي.. الناس دي بتقوم بدور خارق للعادة. ازاي يطّلع امبارح يقول الدولار بعشرة و الناس تصحى تلاقيه بـ13 الصبح و شارخ على 16 على اخر اليوم."

وتابع يوسف قائلا: "ويطّلع عادي ويقول ان دي ضربة معلم عشان الاخوان خسروا 18 مليار دولار بالحركة دي.. او يجيب مشهد من فيديو جيم على انها غارات للجيش الروسي و يكمل عادي.. او يطّلع ينفي صفقة الطيارات الرئاسية وبعدين يبررها عادي، او يقول للناس تشرب مية بلمون وفي نفس ذات دين ام الجملة يحكي على أكلاته المفضلة الغالية.. او يروج ان حسن مالك هو سبب أزمة الدولار او ان البلد كويسة وان اللي بيحصل ذي اشاعات سببها عصابة بتروج للمناخ التشاؤمي.."

وأضاف: "القدرة المتجددة على التعريص وعلى التبرير وعلى إيجاد عالم موازي دي شيء جبار يا جماعة. ازاي بيحضر للبرنامج؟ ازاي بيكتب السكريبت؟ ايه هي كواليس البرنامج وهو بيتلقى الأخبار الجميلة قبل ما يطّلع الهواء وبيقرر ايه هي حركات الجمباز العقلي اللي حيقوم بيها عشان يبرر النهاردة؟ ازاي بيمتلك ثقة في النفس كده وهو مستوى كفائته وذكاءه وامكانياته اقل من إمكانيات شخص مجذوب يجري وراء عربات الرش؟"

وختم يوسف قائلا: "ثم تذكرت إمكانيات اللي مشغله ومستوى اللي مدور البلد وعدد اللي الناس اللي لِسَّه بتصدقه فما عدتش استغرب."

ويشار إلى أن موقع CNN بالعربية لا يمكنه التأكد بشكل مستقل من الأنباء والمعلومات التي يتم تناقلها عبر وسائل التواصل الاجتماعي.